171۔ دنیا میں یہ کیا فتنہ اٹھا ہے مرے پیارے

دنیا میں یہ کیا فتنہ اٹھا ہے مرے پیارے

ہر آنکھ کے اند رسے نکلتے ہیں شرارے

یہ منہ ہیں کہ آہنگروں کی دھونکنیاں ہیں

دل سینوں میں ہیں یا کہ سپیروں کے پٹارے

راتیں تو ہوا کرتی ہیں راتیں ہی ہمیشہ

پر ہم کو نظر آتے ہیں اب دن کو بھی تارے

ہے امن کا داروغہ بنایا جنھیں تو نے

خود کررہے ہیں فتنوں کو آنکھوں سے اشارے

اسلام کے شیدائی ہیں خونریزی پہ مائل

ہاتھوں میں جو خنجر ہیں تو پہلو میں کٹارے

سچ بیٹھا ہے اک کونہ میں منہ اپنا جھکا کر

اور جھوٹ کے اڑتے ہیں فضاؤں میں غبارے

ظلم و ستم و جور بڑھے جاتے ہیں حد سے

ان لوگوں کو اب تو ہی سنوارے تو سنوارے

طوفان کے بعد اٹھتے چلے آتے ہیں طوفاں

لگنے نہیں آتی ہے مری کشتی کنارے

گر زندگی دینی ہے تو دے ہاتھ سے اپنے

کیا جینا ہے یہ جیتے ہیں غیروں کے سہارے

اخبار الفضل جلد 6۔ 5اگست 1952ء۔ لاہور ۔ پاکستان

اردو ادب کا احمدیہ دبستان