26۔ قصۂ ہجر ذرا ہوش میں آلوں تو کہوں

قصۂ ہجر ذرا ہوش میں آلوں تو کہوں

بات لمبی ہے یہ سر پیر جو پالوں تو کہوں

عشق میں اک گلِ نازک کے ہوا ہوں مجنوں

دھجیاں جامۂ تن کی میں اڑا لوں تو کہوں

حالِ دل کہنے نہیں دیتی یہ بے تابیٔ ِدل

آؤ سینہ سے تمھیں اپنے لگا لوں تو کہوں

حال یوں ان سے کہوں جس سے وہ بیخود ہوجائیں

کوئی چبھتی ہومیں بات بنالوں تو کہوں

شرم آتی ہے یہ کہتے کہ نہیں ملتا تو

تیری تصویر کو میں دل سے مٹالوں تو کہوں

وہ مزا ہے غم دلبر میں کہ میں کہتا ہوں

رنجِ فرقت کوئی دن اور اٹھالوں تو کہوں

رازداں اس کی شکایت ہو اسی کے آگے

اس کی تصویر کو آنکھوں سے ہٹالوں تو کہوں

سخت ڈرتا ہوں میں اظہارِ محبت کرتے

پہلے اس شوخ سے میں عہدِ وفا لوں تو کہوں

وہ خفا ہیں کہ بلا پوچھے چلا آیا کیوں

یاں یہ ہے فکر کوئی بات بنالوں تو کہوں

تیرے یوسف کا مجھے خوب پتہ ہے اے دل

کوئی دن اور کنوئیں تجھ کو جُھنکا لوں تو کہوں

دل نہیں ہے یہ تو لعلِ دہن ِافعی ہے

دل کو اس زلفِ سیہ سے جو چھڑالوں تو کہوں

جان جائے گی پہ چھوٹے گا نہ دامن تیرا

پتے تلسی کے میں دو چار چبالوں تو کہوں

یا الھٰی تری الفت میں ہوا ہوں مجنوں

خواب میں ہی کبھی میں تجھ کو پالُوں تو کہوں

اخبار بدر جلد 8۔ 11 مارچ1909ء

http://urdu.goldenpoems.com/

اردو ادب کا احمدیہ دبستان